పూరీ జగన్నాథ స్వామి వారి రత్నభాండాగారం_Mysterious Place in Jagannath Temple granthanidhi mohan publications bhakti pustakalu

పూరీ జగన్నాథ స్వామి వారి

రత్నభాండాగారం

ప్రసిద్ధ పూరీ శ్రీ క్షేత్రం జగన్నాథుడు శృంగార, అలంకార, భోజన ప్రియుడని భక్తులంటారు. ఆయన సన్నిధిలో నిత్యం ఉత్సవాలే. ఏడాదిలో 13 ప్రధాన ఉత్సవాలు. నాలుగుసార్లు రథాలపై ఊరేగుతారు స్వామి. ఆ వేేడుకల్లో నవరత్నాలు పొదిగిన స్వర్ణాభరణాలను స్వామి వారి రత్నభాండాగారం నుంచి తెచ్చి అలంకరిస్తారు. అదీ భాండాగారం మొదటి గదిలో నుంచి. అక్కడ మరిన్ని గదులున్నాయి. కానీ వాటిలోకి ఇప్పటివరకు ఎవరూ ప్రవేశించలేకపోయారు. దీంతో ఈ భాండాగారం అనేక ఏళ్లుగా అంతుచిక్కని రహస్యంగా మారింది.

జగన్నాథుని సేవకులమని చెప్పుకొన్న పూరీ రాజులు అప్పట్లో యుద్ధాలు చేసి.. విజయాలు సాధించి తెచ్చిన సంపదంతా స్వామివారి భాండాగారంలో ఉంచారని చరిత్రకారులు చెబుతారు. ఇందులో వెలకట్టలేని 598 రకాల ఆభరణాలు, కిరీటాలు ఉన్నాయని తెలుస్తోంది. ఈ గదిలో లోకనాథస్వామి (శివుడు) భారీ సర్పం ఆకారంలో కాపలాగా ఉన్నాడని భక్తులు విశ్వసిస్తారు. శ్రీక్షేత్రంపై 18 సార్లు దండయాత్రలు జరిగాయి. కానీ రత్న భాండాగారం లోపలి గదుల్లోకి ఎవరూ ప్రవేశించలేకపోయారు. అందుకే బ్రిటిష్‌ పాలకులు జగన్నాథుని ‘మిస్టీరియస్‌ గాడ్‌’గా అభివర్ణించారు. తమ పాలనలో భాండాగారం సంరక్షణ, నియమావళికి భంగం వాటిల్లకుండా జాగ్రత్తలు తీసుకోవడం విశేషం.

 
జగన్నాథుని రత్నభాండాగారం గురించి అంతా రహస్యమే! లోపల ఎన్ని గదులున్నాయి? ఎంత సంపద ఉంది? ఇవేవీ బయటకు పొక్కవు. మహాలక్ష్మి నిలయంగా భక్తులు విశ్వసించే ఈ భాండగారంలో విశాలమైన గదులు మూడున్నాయన్నది అంచనా మాత్రమే. విలువైన సంపద పుష్కలంగా ఉన్నా.. దానిని చూసిన వారెవరూ లేరు. ఈ భాండాగారాన్ని ఎవరూ తెరిచే ప్రయత్నం చేయరు. 1982లో ప్రభుత్వం తెరవాలనుకుంది. కాకపోతే ప్రారంభ ద్వారం వరకే వెళ్లిన అధికారులు మళ్లీ తిరుగు ముఖం పట్టారు. గది లోపల సర్పాలు బుసలు కొడుతున్న శబ్దాలు వినిపించాయని.. దీంతో అధికారులు లోనికి వెళ్లలేక పోయారని అప్పట్లో ప్రచారం జరిగింది. దీని తాళాలు పూరీ పాలకుల వారసుడు రాజు గజపతి దివ్యసింగ్‌ దేవ్‌ దగ్గర ఉంటాయి. కాకపోతే ఆయనకు కూడా ఇందులో ఏముందో తెలియదు. స్వామి సంపదను ఎవరూ తాకరాదన్న నియమం కట్టుదిట్టంగా అమల్లో ఉంది.

- అయినాల నాగభూషణం, గోపాల్‌పూర్‌